مساحة إعلانية

قصيدة سلطان خلف الرويلي


قصيدة سلطان خلف الرويلي



فريح مدشر : قصيده للشاعر سلطان خلف الرويلي عند زيارته ل طريف ملبيا دعوة الاخ والصديق بندر ممدوح الزومان بمناسبة زواج اخوه سالم الله يوفقه والشاعر سلطان ابدع في صياغة القصيده لان بندر يستاهل الله يوفق الجميع

يا طريف ما جيتك من الوجد مشتاق

ولا لي على جوك حنين وشفاقه

 

صحيح لي بك ربع وافين وأرفاق

معهم تشرفني سلوم الصداقه

 

لكن قسم بالله ما جيت منساق

إلا لمن يحفظ عهود العلاقه

 

ولك ساقني من له معزه وميثاق

ومن الغلا فيني مجود وثاقه

 

جيته ملبي دعوته كلي أشواق

في عرس سالم جعل يكتب وفاقه

 

هذاك ابن زومان لا قالوا أخلاق

بندر رفيق اللي يدور رفاقه

 

له نتعب الخطوه وله نتعب الساق

دامه عشاني متعب(ن) دوم ساقه

 

اللي ليا شاف الخوي خاطره ضاق

يفز فزة حر وقت إنطلاقه

 

ما يهتني بالزاد وبنوم الأمواق

حتى خويه يهتني في مذاقه

 

إن كانها بالجاه وإلا بالأرزاق

عنده على المعروف للبذل طاقه

 

ليا وقف يغني عن شيوخ الأوراق

وليا ضرب يذبح عدوه طراقه

 

متنه يشيل الحمل لو كان ما يطاق

من دون ربعه ما إنذكر شي عاقه

 

شاعر وشعره مرضي(ن) كل الأذواق

خليط بين الحاضره والعراقه

 

حكيم راي .. محنك .. وواسع آفاق

وليا هرج يهرج بلطف ولباقه

 

أرفع له البيضاء على كل شوهاق

النادر اللي طيب الفعل شاقه

 

بدعت له من جزل الأبيات ما لاق

ورتبت له من ورد الإحساس باقه

 

 

سلطان خلف الرويلي

 


1 التعليقات

    1. ارق سنود

      ااالف مبروك
      وصح لسان الشاعر : سلطان الرويلي .
      والله يعطيك العافيه.عزالله ماقصرت يالوافي اولا على حضورك وتشريفك الحفل الذي هو غاية المراد . وعلى هالابيات التي نسجتها برجل كفو ويستاهل كل خير الاخ بندر. تحياتي وتقديري .

      الرد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *