مساحة إعلانية

قصيدة (سلام ياربعي) للشاعر عبدالله دهام الرويلي


قصيدة (سلام ياربعي) للشاعر عبدالله دهام الرويلي



فريح مدشر : قصيده في قمه الروعه للشاعر عبدالله دهام الرويلي يشفق ويتوجد على ربعه ويذكر جلساتهم ودلالهم المبهره وحلو استقبالهم للضيوف واكرامهم له

اشفق على شوف الرجال المناعير
وافـزّ  لا هب الشمال  بنسيمه

حلو النبا  ترحيبهم با اللقا غير
اللي لهم بالقلب قدرٍ و قيمة

سلام يا ربعي عسى فالكم خير
الشوق و عيون  التلاقي  رحيمة

في مجلس ٍ لا جيت به حزة عصير
وكن النّجر يدعي نديم لنديمه

النار وكبار الدلال المباهير
ورجال عزٍ با المواجب كريمة

والارض مرشوشة قبل قومة الطير
والعود الازرق ريحته مستديمه

ونادوا كبار القوم جونا مسايير
وقدوعهم كيف الربوع القديمة

وساقوا لنا صافي حليب المصاغير
وحطوا مع القعدان كبش الوليمة

جونا خوالي والعمام الصقاقير
فرحات عيدٍ في وجيهن  حميمة

سلم على هدبان وهديب و صوير
الروح من دون القرايب سقيمة

وتاريخ قارا ما حوته الأساطير
عدوهم يلقا العواقب وخيمه

واصفان مع زلّوم ربعي مذاخير
يوم النخاوي والخيول الرهيمة

واهل النظايم والرفيعة مغاوير
 يوم القنا والشلف اهل الشكيمة

والشويحيطية يا طوال الاشابير
افعولهم يوم المواقف زعيمة

سلام لطريف الغلا والمعاذير
العين تشكي من ظروفن  يتيمة

وعرعر  وأهلها محتمين الطوابير
لهم تحيات الوفا والحشيمة

وإن رحت تلقا بالقريات تقدير
ربعي هل الفزعات ماهي ظليمة

جماعتي وديارهم  كلها خير
لا جيتهم تلقى الحياة السليمة

وحماية المركب رجالن مشاهير
 اهل السطر مايعرفون الهزيمة

ربعي هل العليا حماة المعاشير 
افعولهم عند الملاقا عظيمة

حنا اختصرنا ديارهم دون تقصير
 عسى عليها من المخاييل ديمة

الوصل رحمه يا الوجيه المسافير
يالله عسى رب الخلايق يديمه

وصلاة ربي عد ورد و نواوير
على   نبي  ٍ سيرته   مستقيمه


أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *