مساحة إعلانية

قصيدة ( بسم الله نبدا ) للشاعر لافي السمن السالمي


قصيدة ( بسم الله نبدا ) للشاعر لافي السمن السالمي



فريح مدشر : الشاعر  المبدع لافي السمن السالمي يهديكم هذه القصيده الرائعه ابياتها دسمه فيها من الحكمه والجزاله الشي الكثير رائعه كروعة صاحبها فله منا كل الشكر والتقدير ..

بسـم الله نـبـدا واسمعـوا قـول لافي

قـصـيــدةٍ دسـمـه ؛؛ ووزن وقـوافـي

هـرج السـراحـه مـالـنـا بالخـوافـي

والگل • مـنّـا • بالمـلا • لـه • مـحـلّـه

 

عنـدي لكم ياجـواد قـولٍ يبي نـحـت

ان مانهضني بينكم نهض ماطحـت

يبقى على لسن العظيمين وان رحت

مخلـدٍ !! لـو مـا اشـتـهـر ،، بالمجـلّـه

 

ياكايـف الراس انتظـر طبخـة الـبـن

هـيـلٍ مـع المـسـمـارٍ في نـجـرٍ يـدن

مـزعـفـره ريـحـه زهـت مـابـهـا ظـن

وآزنـتهـا ((للـقـرم)) فـي وســط دلّـه

 

اشـوف انـا هالوقـت غـيـرٍ عـن اوّل

اسـمـع مـن {الشيبان} قـولٍ يـهــوّل

عـن (( المعـزّه )) بعضهم ما يـحــوّل

والاغلبية • عـاش • عـيـشة • مـذلّـه

 

الـوقـت هـذا وقـت!! فـدني وافـيـدك

حلّيت قـيـدي لـجـل انـا احـل قـيـدك

المصلحه بـنـك لرصـيـدي ورصـيـدك

صـارت هــل الـفـزعــات نــدّر وقـلّـه

 

كل الخطا • في قـول • غـيّـر زمـنّــا

الوقت • هو الوقت • والعيب • مـنّــا

تـغـيّـرت • نـــاسٍ • ونـــاسٍ • تـمنّـا

((ودرب)) المـراجـل بـاقـي للي يـدلّـه

 

اجناس مبطي قالها النـاس بالنـاس

مثـل المعادن يالـذهب مـنـت بـنحـاس

أعــوذ بالله ؛؛، والشـياطين  تـنــداس

مــن گـلـمـةٍ تـطـلـع ولا هـي بـمحـلّـه

 

نمشي مع الايـام ثـم نـاخــذ دروس

نترك هزيل الهرج لضعـاف النفـوس

ومن خامة الشغمـوم فصلت ملبـوس

ومنهـو بغـى الـطــولات عـالٍ مـطـلّـه

 

واسمع گـلامٍ فـيـه خـيـر ونـصيـحـة

عاشر عشير اهـل الوجـيــه الفليحـة

ولاتـقـطـع ارحـامـك وسـدّك تبـيـحـة

يـالله سـتـرك مـن ؛؛ امـر فـيــه زلّــه

 

والجار حـذرا يلحقـه بـالـدهـر ضيم

افرش لـه الـنـوار واحـيـه گمـا الديم

خلّـگ على احـسـانـه للاجيـال تعليم

هـذي {وصـايـا} فـي حـديـثٍ وادلّـه

 

واحرص على فعل الكرم والمواجـيب

وابـعــد عـن اللي جـرّتـه گلها عـيـب

وادرج سـمـا لـلـنـايـفـات المـراقـيـب

گـلـن على {{مـبـداه}} والمعطـي الله

 

واللي يعد الطيب لانساب وانـسـاب

هـذا، غلب هـذا، وهـذا، لـه حـسـاب

لاتـحـسـبـه يـا هـيـه حـكـرٍ للاقـراب

ولاهــو لاحــد مــلـگٍ ولا تـسـتـحـلّـه

 

الـطيب مـايـحـصـر على احـدٍ معيّن

مـا يـاخـذه -قــومٍ- ولا -عــود- ديّن

واضـح على المـطـنـوخ شـوفـه مبّين

مـقـسـمٍ [- للـنـاس -] ولـگـل ، مـلّـه

 

الطيب ((نـبـعٍ)) لـلاجـاويـد مـا جـف

والـطيّـب اللي يــارده بـاول الصـف

مـاتـلحـقـه مـن فــوق مقلوبـة الخـف

هـجـنٍ عـليـهـا دسـام الافـعـال عـلّـه

 

وتـرا الـرجـال افـعـال قبلـي يقولون

واجـد نشاما وابن الاجـواد مـزبـون

ينومسك فعله لاصبح الجوف مغبون

وآآآهي لـگ الـلّــه كــل عـقـدٍ يـحـلّـه

 

اللي عليـه الراي يـبــدا ومـسـمـوع

نطـقـه حكيم وزبدة الـهـرج بـنـفـوع

الـفـم دافـي زيــن ملـقــاه وطـبــوع

فـي مجـلـسـه يـاخـوك مـحــدٍ يـملّـه

 

وغـيــره تـكـدّس بالـعـفــن والمـرجّــه

گــل كلـمـة تـطـري على الـبـال دجِّـه

حتى لـيـا مـنّــه عـلـى الـشــور وجّـه

مـايـطـاوعــه بـالـخـلـق يـاگــود ظلّـه

 

وگـفـو العـيـال اثنـين روس الـنـعـاره

وثـالثـهـم اللي خـامـلٍ فـي نـهـــاره

(ربحٍ) بالاول (راس مال) و(خسـاره)

كـن الـولـد بالـقيـض يـشـدا المـظـلّـه

 

العـفـن يـبقـى عـفـن وش مـاعـطيـتـه

اسـمـه خـسـاره والـردى صـار بيتـه

تـنـگــس ذلـيـل إن كـان للبيت جـيتـه

ابـعــد وخــل الـذيـــخ ابـعـــد وخـلّـه

 

والـراس مـال وبالـفعــل گـنــه ابـــوه

طـلـيـق وجــه وبـالعـطـى ما تـحــدوه

حرصٍ على الخطّـار يامـنـهـم جــوه

هــذا وريــث الـعــــود، دقـــه وجِـلّــه

 

والربـح وشلـون آصفـه في حماسـه

يـومـه تـعـــدا بـالـفـعـل گــل نـاســـه

هبـوب ريـــح وگــل حـسـنٍ مـقـاسـه

ضـارٍ على الـوقـفـات سـيـفـه يـسلّـه

 

عـديـم بـاتـع والسطى مـن جـنــوده

فوق الكرم والطيـب تـقفـي حــدوده

هـذا هـو گـحـيــلان غصب ونــزوده

هـذا شمـخ ذگـره على الجــود گـلّـه

 

((وأصل الفتى فعله)). ردي وولـيـده

امـا يـجـيـب ،، الـصـيـت ولا يـبــده

ومنـهـو وقـف للـخـيــر ربـه يــزيــده

عـنـد الـعظيـم الحـق يـرفـع سـجـلّـه

 

سبـحـانـه الرحـمـن الواحــد الحـي

اللي فـرق بالناس والشمس والفـي

مـاغـيـره المعـبــود وارفــع لـه يــدي

يـالـلـه عـفــوك يـــوم فـرقــآ الاخـلّـه

 


4 التعليقات

إنتقل إلى نموذج التعليقات

    1. خالد السالمي

      صح لسانك💙.

      الرد
    2. فواز الكويكبي

      صح لسانك ،، ماهي غريبه على الشاعر لافي .. شاعر جزل اتمنى له التووووووفيق …

      الرد
    3. ابو فارس الشراري

      صح لسانك واعتلا شانك
      شاعر جزل 😘

      الرد
    4. لافي السمن

      صحت ابدااااانكم لاهنتوا يا منبع الجزاله

      الرد

أضف تعليق

لن يتم نشر عنوان بريدك الإلكتروني. الحقول الإلزامية مشار إليها بـ *